ირაკლი ქარსელაძე-2030 წლისთვის დახურული იქნება ყველა ძველი ნაგავსაყრელი და აშენებული იქნება 6 ახალი რეგიონული ცენტრი
23 ივლისი 2021„დავიწყეთ და მომდევნო წლებშიც გავაგრძელებთ ძველი მუნიციპალური ნაგავსაყრელების დახურვას და ახალი რეგიონული განთავსების ნაგავსაყრელების მშენებლობასა და მათ სათანადო მართვას“ -განაცხადა რეგიონული განვითარებისა და ინფრასტრუქტურის მინისტრმა ირაკლი ქარსელაძემ სამინისტროს 10 წლიანი გეგმის პრეზენტაციისას.
მისი თქმით, მყარი ნარჩენების მართვის მიმართულებით, მომდევნო წლების უმთავრესი ამოცანა იქნება მოწესრიგებული და ევროპული სტანდარტების შესაბამისი, ადამიანის ჯანმრთელობისა და გარემოსთვის უსაფრთხო, შესაბამისი ტექნიკური საშუალებებით აღჭურვილი ინფრასტრუქტურის შექმნა.
როგორც პრეზენტაციაზე აღინიშნა, 54 მუნიციპალური ნაგავსაყრელიდან უკვე დახურულია 24 ნაგავსაყრელი, 30-ს კი ჩაუტარდა რეაბილიტაცია.
2025 წლისთვის დასრულდება 4 ახალი ნაგავსაყრელის მშენებლობა ქუთაისში, ქვემო ქართლში, კახეთსა და სამეგრელო-ზემო სვანეთში, ხოლო 2030 წლისთვის დახურული იქნება ყველა ძველი ნაგავსაყრელი და აშენებული იქნება სულ, 6 ახალი რეგიონული ცენტრი.
ამასთან, ქვეყნის მთელ ტერიტორიაზე გაუმჯობესდება მუნიციპალური ნარჩენების შეგროვების სერვისი, განახლდება ტექნიკური ბაზა, დაინერგება უფრო ეფექტური მართვის პროცესები, რაც მკვეთრად შეამცირებს გარემოზე მავნე ზემოქმედებას.
რაც შეეხება ინვესტიციას, ამ მიმართულების დაფინანსება ზუსტად 5-ჯერ არის გაზრდილი და მომდევნო 10 წლის განმავლობაში, 613 მილიონ ლარზე მეტი მოხმარდება.
